ДЫПЛОМНАЯ РАБОТА ЯК АДЗІН З ВІДАЎ НАВУКОВАЙ ПРАЦЫ

У артыкуле адлюстроўваюцца асаблівасці беларускага навуковага маўлення пры рабоце над дыпломным праектам, даюцца асновы падрыхтоўкі і афармлення навуковай працы ў адпаведнасці з нарматыўнымі дакументамі, вызначаюцца асноўныя заканамернасці функцыянальнага стылю навуковай і тэхнічнай літаратуры. Варта мець на ўвазе, што дыпломная работа – гэта не пераказ крыніц літаратуры, а дастаткова самастойная даследчая праца. Яна ўключае ў сябе: вылучэнне праблемы, якая не атрымала дастатковага асвятлення ў літаратуры; выяўленне і ўвядзенне ў навуковую мову новых крыніц і паведамленне на гэтай аснове новых фактаў; устанаўленне новых сувязей паміж вядомымі з’явамі; новую пастаноўку вядомай праблемы; арыгінальныя вывады; рэкамендацыі аб выкарыстанні выяўленных матэрыялаў і вывадаў у навуцы або практыцы. Выкананне дыпломнай работы ў значнай меры дае магчымасць меркаваць аб падрыхтаванасці выпускніка да далейшай дзейнасці. Асноўнымі мэтамі дыпломнай работы з’яўляюцца: сістэматызацыя, пашырэнне і паглыбленне тэарэтычных ведаў будачага спецыяліста; развіццё навыкаў самастойнай працы, авалоданне методыкай даследавання і эксперыментаванне пры рашэнні практычных задач. Артыкул будзе карысны студэнтам усіх спецыяльнасцей тэхнічных ВНУ пры падрыхтоўцы, афармленні і абароне дыпломнай работы.